थापाले वर्तमान सरकार लोकतन्त्रको विरोध गर्न बनेको दाबीसमेत गरे। ‘देशको खरानीबाट निस्किएको सरकारबारे यसअघि सुशीला कार्कीले पनि भनिसक्नुभएको छ। वालेन्द्र सरकार लोकतन्त्रको विरोध गर्न बनेको हो,’ उनले भने।

उनले सरकारको आधार ‘आर्मी, अल्गोरिदम र अमेरिका’ रहेको आरोप लगाए। यी तीनै पक्षको साथ विस्तारै घट्दै जाँदा प्रधानमन्त्री वालेन्द्र शाह एक्लिँदै गएको उनको दाबी थियो।

‘यो सरकारको स्रोत आर्मी, अल्गोरिदम र अमेरिका हो। अहिले यी तीनैले साथ दिन छाड्दै जाँदा वालेन्द्र एक्लिँदैछन्। त्यसैले यो सरकारको मुखिया वालेन्द्र शाहले एक्लो भएको महसुस गर्दैछन्,’ थापाले भने।

थापाले मुलुकमा महँगी, बेरोजगारी र आर्थिक संकट बढेको भन्दै सरकारको आलोचना गरे। महँगीले आकाश छोएको, बेरोजगारीले धर्ती ढाकेको र मानिसहरू भोकभोकै बस्नुपर्ने अवस्था आएको उनको भनाइ थियो।

उनले उद्योगीमाथि धरपकड बढेको, खर्बौँ रुपैयाँको लगानी विदेशिन थालेको र बैंकबाट लगानी गर्ने वातावरण नरहेको बताए। राज्यको ‘आतंक’का कारण भएको पुँजीसमेत निष्क्रिय रहेको र शेयर बजार ध्वस्त भएको उनको दाबी थियो।

सरकारको कु–प्रबन्धका कारण तेल र ग्यासको समेत हाहाकार भएको थापाले बताए।

‘यो निर्दयी सरकारले गरिब जनताले सीमापारिबाट ल्याएको एक किलो चिनी, एक दर्जन केरा खोस्छ। तर विमानस्थलबाट रेड लेबलसहितका महँगा मदिरा र आईफोन ल्याउन दिन्छ,’ उनले भने।

थापाले सरकारप्रति जनताको असन्तुष्टि बढिरहेको दाबी गर्दै भने, ‘भोका जनताले गाँस माग्छन् तर यो सरकारले तातो गोली दिन्छ। देशका कुनाकुनामा देखिने दृश्यले यही कथा सुनाइरहेका छन्।’

उनले मुलुकका समस्या समाधान गर्न सरकारसँग कुनै परिणाममुखी योजना नरहेको आरोप लगाए।

‘मुलुकको समस्याको परिणाममुखी समाधान के हुन सक्छ? यो सरकारसँग कुनै योजना छैन,’ उनले भने।

थापाले प्रधानमन्त्री शाहलाई राष्ट्रियता र जनजीविकाका मुद्दामा फर्किन आग्रह गरे। उनले प्रधानमन्त्री शाह लोकतन्त्र र संसद्प्रति जिम्मेवार बन्नुपर्ने तथा राज्यसत्ता र संख्याको बलमा नभई ऐन–कानुनअनुसार सरकार सञ्चालन गर्नुपर्ने बताए।

‘प्रधानमन्त्री वालेन्द्र शाह राष्ट्रियता, जनजीविकाका मुद्दामा अब फर्किनुपर्छ। प्रधानमन्त्री शाह लोकतन्त्र र संसद्प्रति जिम्मेवार हुनुपर्छ। प्रधानमन्त्री संख्या र राज्यसत्ताको बलमा होइन, ऐन–कानुनबाट चल्नुपर्छ,’ थापाले भने।